Քանդակագործության փառատոնի շրջանակում ներկայացնում եմ իմ աշխատանքը։ Ես այն վերնագրել եմ ‹‹Փոքր Մհեր՝ ամպ ու արև››։
Փոքր Մհերը պատերազմում է թշնամիների դեմ, հաղթում՝ սպանելով Չմշկիկ Սուլթանին՝ լուծելով հոր վրեժը։ Նա ամուսնանում է գեղեցկուհի Գոհարի հետ։ Բայց կատարվում է հոր անեծքը. Մհերը մնում է անժառանգ։ Մահանում է Գոհարը, և հողն այլևս չի դիմանում Մհերի ոտքերի տակ։ Սասնա վերջին քաջազունը սլանում է փակվելու Ագռավաքար ժայռի մեջ՝ պատգամելով.
Քանի աշխարք չար է,
Հողն էլ ղալբցեր է,
Մեջ աշխարքին ես չեմ մնա։
Որ աշխարք ավերվի, մեկ էլ շինվի,
Եբոր ցորեն էղավ քանց մասուր մի,
Ու գարին էղավ քանց ընկուզ մի,
Էն ժամանակ հրամանք կա,
որ էլնենք էդտեղեն։
Իմ աշխատանքը կոլաժ է։ Օգտագործել եմ բնական նյութեր՝ քարեր, ծաղկաթերթիկներ, խոտաբույսեր, ինչպես նաև գործվածք, ստվարաթուղթ, փայլաթիթեղ, փայլաթուղթ, գուաշ, մատիտներ։ Աշխատանքն իրականացրել եմ ֆաներայի մակերեսի վրա՝ ծածկելով այն արևագույն գուաշով ներկված կտորով։
Գայանե Խաչատրյան 